Valsiger!

Livet dei siste dagane har mildt sagt likna ei berg-og-dalbane: Eg drog på studietur med jobben min til Brüssel grytidleg tysdag morgon, superdeppa over SV sitt valresultat og 100 prosent overbevist om at også kampen vår for å få til raudt fleirtal i bydel St. Hanshaugen der eg stilte til val hadde mislukkas. Så – medan eg var oppteken med foredrag og møter i EU-hovudstaden – byrja meldingane og telefonane å kome om at det slett ikkje var så sikkert at bydel St. Hanshaugen ville få blått fleirtal dei neste fire åra likevel.

Og no - etter MYKJE fram og attende - er resultatet endeleg klart: Bydel St. Hanshaugen har raudt fleirtal!!! Og – og det er nesten endå betre i ein elles trist SV-kvardag - det er SV sitt sistemandat som sikrar venstresida fleirtal!

Ein aktiv, målretta og offensiv SV-valkamp har altså gjeve resultat. Nett no er eg så glad at eg nesten berre vil grine, og eg gler meg vilt og hemningslaust til å starte arbeidet saman med Nora Fjelddalen og Morten Drægni – dei to andre SV-representantane i bydelsutvalet - med å setje ut i livet all den framtidsretta og miljøoffensive SV-politikken som me har ført – og vunne – valkampen på.

Og til alle SV-veljarane i bydelen min: Takk, takk, takk og takk! De vil ikkje verte skuffa over at de gav oss røystene dykkar!