Uakseptabelt

Regjeringa går no inn for å sende rundt 150 spesialsoldatar til Afghanistan.

Rett nok til Kabul. Og altså ikkje til Sør-Afghanistan, der krigen i landet er verst.

Men det skal kun ein våroffensiv frå Taliban til for å gjere dén skilnaden for akademisk – og knapt nok det – å rekne.

Og ein slik offensiv vil kome.

Med dette har difor SV etter mitt syn no mista den andre av dei to verkeleg verdifulle sigrane i Soria Moria-erklæringa:

Den eine var gjennomslaget for CO2-frie gasskraftverk frå dag 1.

Den andre var altså gjennomslaget for ingen offensive styrkebidrag til krigen i Afghanistan.

Difor meiner eg no at SV må ut av Regjeringa.

For det fyrste av di me altså står andsynes eit offensivt norsk styrkebidrag til krigen i Afghanistan.

Men for det andre av di det no verkar heilt openbert at korkje Ap eller Sp er viljuge til å strekkje seg like langt for at SV skal verte verande i regjeringskontora som det SV er viljuge til å strekkje seg for dei to andre partia.

Det er skuffande.

Men å halde fram i ein slik situasjon fryktar eg vil gjere det vanskelegare og vanskelegare for SV å setje foten ned når Regjeringa igjen går inn for standpunkt SV ikkje kan gå med på.

Og kor SV då er etter stortingsvalet i 2009 er det slett ikkje godt å seie.

Oppdatering: Du kan også høyre på radio kva eg meiner om saka.